Arduino Uno WiFi & Arduino MKR VIDOR: أردوينو جديدة.. ليست للهواة فقط

مصدر الخبر : صنعة | مايو 19، 2018

لو جينا نشوف ايه أهم حاجة مشتركة ما بين أي ميكر في العالم، كل الناس هتقول “الArduino”. مفيش أي ميكر موجود إلا و سمع عنه عالأقل، ده لو مكانش استعمله في إنه يخلي بيته بيتم التحكم فيه بالموبايل، أو يسقي الزرع و يأكل الكلب أوتوماتيك، أو حتى يعمل هدوم بتنور في الضلمة، حرفيا.

الأردوينو هي لوحة إلكترونية فيها كمبيوتر صغير أوي و معاه مجموعة من الأجهزة الدقيقة إللي بتقدر تخليه يتعامل مع العالم الخارجي، و اتشهر جدا في آخر 5 سنين ك-أداة بيستعملها الناس عشان يتعلموا مبادئ البرمجة والإلكترونيات، و كمان عشان الناس تقدر تعمل نسخ أولية (Prototypes) من مشاريعها قبل مرحلة التنفيذ التجاري.. بل و كمان فيه ناس شافت إنها قوية كفاية لدرجة إنها تعمل بيها منتجات صناعية، زي زي موديلات من طابعات MakerBot ثلاثية الأبعاد.

بسبب سهولة إن أي حد تقريبا يقدر يعمل أي حاجة بالأردوينو و بمستوى سهولة إنك تعمل طبق أومليت، الأردوينو في مجتمعات الميكرز و المهندسين تحديدا الأكثر خبرة (مش الهواة)، إللي بيتعاملوا مع الإلكترونيات بشكل معقد أكتر، اكتسبت سمعت وحشة جدا عن إنها بتخلي الناس ميتعلموش حاجة وإنها بتطلع جيل من الناس اللي فاكرين نفسهم كويسين. لكن دي مش حقيقة، ﻷن ده عكس أهداف الشركة المصنعة للأردوينو، إللي أهم أهدافها توفير منصة إلكترونيات قوية تساعد على أن مستوى التصنيع الشخصي و الحركات اللي في كل العالم في مجال التصنيع الشخصي يعلى و يكون قريب من المستوى الصناعي (Maker Movement).

و عشان كده، أردوينو بدأت بعد النجاح الساحق للثلاثي (Uno, Mega, Nano)، إنها تنزل نسخ تانية أكتر قوة وأكثر احترافية عشان تخدم علي مجتمع من المحترفين أكتر، و كمان بسبب واجهتها السهلة تخلي المستخدم الهاوي يقدر يتعامل مع أنواع أعلى و أرقى من الشرائح الإلكترونية..

في آخر يومين، أطلقت شركة أردوينو في ميكرفير باي آيريا (Maker Faire Bay Area) بوردتين يعتبروا من أرقى و أحسن ما تم إنتاجه في عيلة الأردوينو كلها: Arduino Uno WiFi و  Arduino MKR VIDOR 4000 و اللي هنتكلم عليهم بالتفصيل في المقالة دي.

Arduino Uno WiFi

Arduino Uno WiFi

أول بوردة أردوينو يكون فيها واي فاي مدمج، عن طريق شريحة ESP8266، هتوفر دخول سريع و سهل ﻷي انترنت في الدنيا أو حتى الشبكات المحلية، و كمان أول بوردة يكون فيها معالج مخصوص للتشفير (Cryptographic Co-Procesor) ﻷن في عصر الIoT لازم كل الاتصالات تكون متشفرة و آمان، مش هتبقي مبسوط لو حد في الشقة اللي جنبك بيطفي عليك نور الأوضة كل يوم.

كمان الأردوينو واي-فاي فيها ميكروكنترولر جديد بدل الATMEGA328P، إللي هو ATmega4809: أسرع من القديم، وفيه رام أكتر و مساحة تخزين أعلى. كمان فيه خاصية مهمة و هي ال Core Independent Peripherals إللي بتخلي الملحقات إللي مع بروسيسور الأردوينو تقدر تشتغل بشكل منفصل، يعني يكون مع المبرمج دلوقتي قدرة إنه يتحكم براحته في الPins بتاعة الأردوينو و يغير ترتيبهم أو استعمالاتهم بما يناسب الشغل بتاعه.

و أخيرا هيكون فيها Analog to Digital Converter قوي و يقدر يقرا مختلف أنواع السنسورات بدقة أعلى من الموجودين حاليا. ميعاد الإصدار هيكون في نص يونيو، والسعر متحددش لحد دلوقتي.

أهم الخصائص في الاردوينو واي فاي:

- Microchip ATmega4809 8-bit microcontroller.
- Microchip ATECCC608 CryptoAuthentication hardware-based security.
- High-speed Analog-to-Digital Converter.
- Core Independent Peripherals.
- 6KB RAM.
- 48KB Flash.
- 3 UARTS.
- ESP32 WiFi.

Arduino MKR VIDOR 4000

Arduino MKR VIDOR 4000

البوردة دي أقل ما يقال عنها إنها فعلا نقلة في عالم الميكرز و منصات التطوير الإلكتروني، ﻷنها اول بوردة توفر للهواة و المستخدمين العاديين إمكانيات الدواير المنطقية القابلة للبرمجة عن طريق شريحة FPGA محطوطة فيها مع المعالج الرئيسي، الFPGA عبارة عن تكنولوجيا بتخلي المطورين يكتبوا كود يترجم بشكل مباشر لمجموعة من الدواير الإلكترونية اللي بتكون معمولة مخصوص عشان تنفذ الكود بتاعك بكفاءة عالية جدا، وقدرة عالية علي إنها تكون أي حاجة تقريبا، يعني تقدر تخليها معالج لو عايز، أو وحدة جرافيكس أو رام زيادة للأردوينو أو حتى تكون بوردة أو سنسور ديجتال مش متاح ليك دلوقتي. تكنولوجيا الFPGA موجودة من التمانينات لكنها كانت متوفرة لجمهور قليل و بأسعار غالية جدا، و طرق برمجتها مش سهلة، دلوقتي أردوينو جاية تتحدي ده كله ببوردة الMKR VIDOR 4000.

طبعا، زي الأردوينو واي فاي، النسخة دي مزودة ب-وايفاي مدمج و معالج تشفير عشان تقدر تتصل بالانترنت بمنتهي الأمان و السرعة، و ده يخليها مناسبة جدا مع اللي اتقال فوق ﻷنظمة الذكاء الصناعي اللي تتحكم بالبيوت أو المدن الذكية. ميعاد الإصدار هيكون في نص يونيو، بس السعر متوقع يكون كبير جدا.

أهم الخصائص في الاردوينو MKR VIDOR 4000:

- ARM-Based SAMD21 Microcontroller.
- FPGA (Field Programmable Gate Array) with 16K Logic elements.
- ECC508 crypto-chip to connect to local networks and the Internet.
- U-blox Nina W102-00B WiFi connectivity.
- Mini-PCI Express Connector

سواء اختلفت او اتفقت علي قدرات الأردوينو و تأثيرها في مجتمع الميكرز، مش هنقدر ننكر أبدا إن أردوينو هي من أهم الحاجات اللي حصلت للمجتمع ده و إدتنا القدرة على أننا نسرع تطوير المنتجات المعتمدة عالهاردوير و فتحت آفاق جديدة للتطوير في حتت كتير زي الروبوتات و الاجهزة الذكية و انترنت الأشياء، و حاليا مهمتهم إنهم يدعموا مش بس الهواة و اللي بيتعلموا إلكترونيات، لا و كمان يدعموا المهندسين المحترفين في مجال الIoT تحديدا.


Mohamed

 

 

إذا كان ثمة ما يشغلك لاتتردد في إضافة تعليق